Site icon Ethiopian Legal Brief

Directives and Guidelines of Ethiopian Civil Service Agency

Directives and Guidelines of Ethiopian Civil Service Agency

Promotion Directive

Permanent Employment  Directive

Temporary Employment  Directive

Transfer Directive

Guards Improved Working  Hours Directive

Qualification Requirement Directive

Allowances Guideline

Inspection Guideline

Transfer Guideline

Health & Occupational  Safety Guideline

TVET Certificate & Diploma Employment Salary Level

Circular on Proclamation No 515-1999 EC -Explanation of Federal Civil Service Agency

በኮንትራት/ በጊዜያዊነት በፌዴራል የመንግስት መሥሪያ ቤቶች ተቀጥረው የሚገኙ ሠራተኞችን ቋሚ ለማድረግ የወጣ የአፈጻጸም መመሪያ

በፌዴራል መንግስት መስሪያ ቤቶች በሚገኙና ከመደበኛ የስራ ሰዓት ውጪ በዘላቂነት አገልግሎት መስጠት በሚያስገድዱ የሾፌር መደቦች ላይ ተመድበው ለሚሠሩ ሠራተኞች ልዩ አበል ስለሚፈቀድበት ሁኔታና ስለክፍያው መጠን ለመወሰን የወጣ መመሪያ

በኮንትራት/ በጊዜያዊነት በፌዴራል የመንግስት መሥሪያ ቤቶች ተቀጥረው የሚገኙ ሠራተኞችን ቋሚ ለማድረግ የወጣ የአፈጻጸም መመሪያ

pdf

የፌዴራል የመንግሥት ሠራተኞች ስለሚቀጠሩበት እና ስለሚተዳደሩበት አጠቃላይ አሰራር በአዋጁ ቁጥር 515/99 በዝርዝር መደንገጉ ይታወቃል፡፡ በዚሁ አዋጅ አንቀጽ 1 የመንግስት ሠራተኛ ማለት በፌዴራል የመንግስት መሥሪያ ቤት ውስጥ በቋሚነት ተቀጥሮ የሚሰራ ሰው መሆኑን በግልጽ ተመልክቷል፡፡ በሌላም በኩል በአዋጁ አንቀጽ 2 እና አንቀጽ 22 ላይ ጊዜያዊ ሠራተኛ ማለት በመንግስት መ/ቤት ውስጥ የዘላቂነት ባህርይ በሌለው ሥራ ወይም ሁኔታዎች ሲያስገድዱ ለአጭር ጊዜ የሚቀጠር እና ሥራው ሲጠናቀቅ የሚሰናበት መሆኑ ግልጽ ቢሆንም በፌዴራል የመንግሥት መሥሪያ ቤቶች ውስጥ ከሚታዩ ያልተስተካከሉ የቅጥር አፈጻጸም አሠራሮች ውስጥ የኮንትራት/ ጊዜያዊ ቅጥር ዋነኛው ሆኖ ተገኝቷል፡፡ ይህ አሠራር በመንግሥት የበጀት አጠቃቀምና በዕቅድ አፈጻጸም ላይ ከፍተኛ ችግር እያስከተለ ከመሆኑም ባሻገር ሰራተኞቹ ዘላቂነት ባላቸው የተቋሙ ሥራ መደቦች ላይ በመቀጠራቸው ይኸው የኮንትራት ውል ለረዥም ዓመታት እየተንከባለለ መቆጣጠር እማይቻልበት ደረጃ ከመድረሱም ባሻገር አሁን ያለው በእቅድ ያለመመራት የሰው ኃይል ቅጥር ችግር የሚቀጥል ከሆነ በመንግስትና በዜጐች ላይ ከፍተኛ ኪሳራ ሊያስከትል እንደሚችል እንዲሁም በየተቋሙ በኮንትራት የተቀጠሩ ሠራተኞች የሚቆዩት ቋሚ ሥራ እስኪያገኙ ድረስ ብቻ በመሆኑ ቀጣይነት ባለው መልኩ የሰው ኃይል ልማት ማረጋገጥ ስለማያስችል ለአንዴና ለመጨረሻ ጊዜ ችግሩ መፍትሄ ማግኘት እንዳለበት በመንግስት ታምኖበታል፡፡

በመሆኑም የጠቅላይ ሚኒስትር ጽ/ቤት ህዳር 18 ቀን 2ዐዐ5 ዓ.ም በቁጥር መ8ዐ- 839/1 በተጻፈ ደብዳቤ ዘላቂነት ባለውና በተመደበ የሥራ መደብ ላይ በኮንትራት/በጊዜያዊነት/ በፌዴራል የመንግስት መሥሪያ ቤቶች ተቀጥረው ያልተቋረጠ አገልግሎት ሲሰጡ የቆዩ ሠራተኞች በክፍት የቋሚ የሥራ መደቦች ላይ በቋሚነት እንዲመደቡ ትዕዛዝ ሰጥቷል፡፡ በዚህም መሠረት ማንኛውም የፌዴራል መንግስት መሥሪያ ቤት ይህ መመሪያ እስከተላለፈበት ቀን ድረስ ዘላቂነት ባለውና በሲቪል ሰርቪስ ሚኒስቴር በተመደበ የሥራ ደረጃ ላይ በኮንትራት/በጊዜያዊነት

ቀጥሮ ሲያሰራቸው የነበሩ ሠራተኞችን በመለየት፣

ሀ/ ቋሚ ምደባ ከመከናወኑ በፊት በስሩ የሚገኙና ይህ መመሪያ የሚመለከታቸውን የኮንትራት/ጊዜያዊ ሠራተኞችን ዝርዝር እና ሌሎች ሁኔታዎች ከዚህ መመሪያ ጋር ተያይዞ በተላከው ቅጽ ላይ በመሙላት ለሲቪል ሰርቪስ ሚኒስቴር እንዲላክ፣

ለ/ የጊዜያዊ/የኮንትራት ሠራተኞቹ ቋሚ የመንግስት ሠራተኛነት በተቋሙ ውስጥ ለመቀጠል ፍላጐት ያላቸው መሆኑ ተረጋግጦ የቅጥር ማስታወቂያ ማውጣት ሳያስፈልግ ሠራተኞቹ በፌዴራል የመንግስት ሠራተኞች የተፈላጊ ችሎታዎች መመሪያ መሠረት በኮንትራት/በጊዜያዊነት ተቀጥረው ሲያገለግሉ ለነበረበት የሥራ ደረጃ ዝቅተኛውን የተፈላጊ ችሎታ ማሟላታቸውን እየተረጋገጠ በዚሁ የሥራ መደብ ላይ መመሪያው ከተላለፈበት ቀን ጀምሮ ቋሚ እንዲሆኑ፣

ሐ. ቋሚ የመንግስት ሠራተኛ ሆነው መቀጠል የማይፈልጉ ጊዜያዊ/ኮንትራት ሠራተኞች ይህ መመሪያ በተላለፈበት አንድ ወር ጊዜ ውስጥ ውላቸው ተቋርጦ እንዲሰናበቱ ፡፡

መ. ከጊዜያዊ/ከኮንትራት ወደ ቋሚ የመንግስት ሠራተኝነት ለመቀጠር የተስማሙ ሠራተኞች በተቋሙ የሚመደቡበት /የሚደለደሉት እንደሚከተለው ይሆናል፡፡

  1. ተቋሙ የመሠረታዊ የሥራ ሂደት ለውጥ ጥናት አከናውኖ አዲስ ድርጅታዊ መዋቅር አጥንቶ አጠቃላይ የሠራተኛ ድልድል የሚያካሂድበት ደረጃ ላይ ካለ ከአጠቃላይ ሠራተኞች ጋር ተወዳድረው በሚያሟሉበት የሥራ ደረጃ ይመደባሉ፡፡
  2. ከላይ በተራ ቁጥር 1 የተጠቀሰው ቢኖርም ቋሚ ሰራተኛና ጊዚያዊ/ኮንትራት ሰራተኛ ተወዳድረው እኩል ነጥብ ካገኙ ቋሚ ሰራተኛው ቅድሚያ ይደለደላል፡፡
  3. መሥሪያ ቤቱ በአዲስ መዋቅር ሠራተኞችን ደልድሎ ያጠናቀቀ ሆኖ ባሉት ክፍት የሥራ መደቦች ላይ ተመድበው የሚያገለግሉት በጊዜያዊነት/በኮንትራት የተቀጠሩ ሠራተኞች ከሆኑ አጠቃላይ የሠራተኞች እንደገና ድልድል ማድረግ ሳያስፈልግ ጊዜያዊ/ኮንትራት ሠራተኞቹ ለሥራ መደቡ የሚያስፈልገው ዝቅተኛ ተፈላጊ ችሎታ ማሟላታቸውን በማረጋገጥ ይመደባሉ፡፡
  4. ከፍ ሲል በፊደል ‘ሀ’ የተጠቀሰው ቢኖርም በተመሳሳይ የሥራ መደቦች ላይ ያሉ የኮንትራት ሠራተኞችን ቋሚ በማድረጉ ሂደት የሠራተኞች ቁጥር ከሥራ መደቦች ቁጥር የበለጠ ከሆነ ሠራተኞችን በማወዳደር ብልጫ ያገኙት በስራ መደቡ ላይ በቋሚነት እንዲቀጠሩ ይደረጋል፣
  5. በኮንትራት ቅጥራቸው ምክንያት ከፍ ያለ ወይም ዝቅ የለ ደመወዝ የሚከፈላቸው ሠራተኞች ካሉ በሲቪል ሰርቪስ ሚኒስቴር ለሥራ ደረጃው የተፈቀደው ደመወዝ በቋሚነት ከተመደቡበት ጊዜ ጀምሮ ይከፈላቸዋል፡፡
  6. በቋሚነት እንዲቀጠሩ የተደረጉ የኮንትራት/ጊዜያዊ ሠራተኞች አገልግሎታቸው ለጡረታ የሚታሰብላቸው ቋሚ የመንግስት ሠራተኛ እንዲሆኑ ከተመደቡበት ጊዜ ጀምሮ እንዲሆን፣
  7. ሠራተኞቹ ቀደም ሲል በሌሎች የመንግሥት መሥሪያ ቤቶች በቋሚነት ተቀጥረው ሲያገለግሉ የነበሩ ከሆነ አገልግሎታቸው ከዚህ በኋላ ከሚሰጡት አገልግሎት ጋር እየተደመረ እንዲያዝላቸው፣

ሠ/ በሲቪል ሰርቪስ ሚኒስቴር ባልተመደበና ዘላቂነት በሌለው የሥራ መደብ ላይ በኮንትራት/በጊዜያዊነት ተቀጥረው የነበሩ ሠራተኞች ቅጥር እንዲቋረጥ ሆኖ በአስቸኳይ እንዲሰናበቱ፣

ረ/ በኘሮጀክት የሚፈፀም የኮንትራት/ጊዜያዊ ቅጥር ቀደም ሲል በነበረው አሠራር እንዲቀጥል፣ እንዲደረግና አፈጻጸሙ በአስቸኳይ እንዲገለጽልን እያሳሰብን፣ ይህ መመሪያ ለአንድ ጊዜ አፈፃፀም ብቻ የሚያገለግል ሲሆን ከየካቲት 30/2005 ዓ.ም በኋላ ተግባራዊ ማድረግ አይቻልም፡፡ ከዚህ በኋላ በማንኛውም የፌዴራል መንግስት መሥ/ቤት እጅግ አስፈላጊ ለሆነና ለአጭር ጊዜ ብቻ የኮንትራት/ጊዜያዊ ቅጥር መፈፀም አስገዳጅ ሁኔታ ከተፈጠረ ጥያቄው በቅድሚያ ለመሥሪያ ቤታችን እየቀረበ ተቀባይነት ማግኘቱ መረጋገጥ ያለበት መሆኑን እየገለጽን፣ ከዚህ ውጭ በማንኛውም መልኩ የኮንትራት/ጊዜያዊ ቅጥር ፈጽሞ የተገኘ የሥራ ኃላፊ በሕጉ መሠረት ተጠያቂ እንደሚደረግ እናስታውቃለን፡፡

በፌዴራል መንግስት መስሪያ ቤቶች በሚገኙና ከመደበኛ የስራ ሰዓት ውጪ በዘላቂነት አገልግሎት መስጠት በሚያስገድዱ የሾፌር መደቦች ላይ ተመድበው ለሚሠሩ ሠራተኞች ልዩ አበል ስለሚፈቀድበት ሁኔታና ስለክፍያው መጠን ለመወሰን የወጣ መመሪያ

pdf

መግቢያ

አገራችንን ከድህነት በማላቀቅ በልማትና በዕድገት ጎዳና ለማራመድ በሚደረገው እልህ አስጨራሸ ትግል አመርቂ ስኬቶች እየተገኙ መሆኑ በገሀድ የሚታይ ዕውነታ ነው፡፡ ለዚህም ሲቪል ሰርቪሱ የልማታዊ ዴሞክራሲያዊ መንግስት ፖሊሲዎችንና ስትራቴጂዎችን በመተግበርና በማስተባበር እያበረከተ ያለው አስተዋፅኦ ከፍተኛውን ድርሻ የሚይዝ ነው፡፡ ሠራተኛውና የስራ ኃላፊዎች የስራ ሰዓት ሳይገድባቸው እንዲሁም ከማዕከል እስከ ገጠር ቀበሌዎች በአገሪቱ አራቱም ማዕዘናት በመንቀሳቀስ የልማት ዕቅዶችን ተግባራዊነት ለማረጋገጥ የሚያደርጉት እንቅስቃሴና የሚያሳዩት ተነሳሽነት መጪው ጊዜ ለአገራችንና ለህዝቦቻችን ብሩህ መሆኑን አመላካች ነው፡፡ ሆኖም መንግስት ያለውን ውሱን አቅም በልማት ዕቅዶች ማስፈጸሚያ እያዋለ በተጓዳኝ ደግሞ የመክፈል አቅሙን ባገናዘበ መልኩ ለመንግስት ሠራተኛው የተለያዩ የደመወዝ ማስተካከያዎችና ልዩ ልዩ ጥቅማ ጥቅሞች በማድረግ ሠራተኛው በባለቤትነት ስሜትና በተነሳሽነት መንፈስ የልማት ዕቅዶቹን ተግባራዊ እንዲያደርግ ለማበረታታት ከፍተኛ ጥረት ሲያደርግ ቆይቷል፡፡ ምንም እንኳን የመንግስት ፍላጐትና አሁን ያለውን የመክፈል አቅም ለማጣጣም መፈተሸ ያለባቸው በርካታ ጉዳዮች ቢኖሩም በተለይ በዝቅተኛ የክፍያ ደረጃ ላይ ለሚገኙ ሠራተኞች ልዩ ትኩረት በመስጠት አስፈላጊውን ድጋፍ በማድረግ ላይ ይገኛል፡፡ በዚህም መሠረት በተለይ የስራ ባህሪያቸው ከመደበኛ የስራ ሰዓት ውጪ ለመስራት የሚያስገድዳቸው በተወሰኑ የሾፌር የስራ መደቦች ላይ የሚያገለግሉ ሠራተኞች ለተለያዩ ተጨማሪ ወጪዎች መዳረጋቸውን በመግለጽ በተደጋጋሚ ቅሬታ እያቀረቡ በመሆኑ በጉዳዩ ላይ ጥናት በማድረግ አስፈላጊው የማካካሻ ክፍያ ሊደረግላቸው እንደሚገባ በመታመኑ ይህን መመሪያ የፌዴራል ሲቪል ሰርቪስ ሚኒስቴር አዘጋጅቷል፡፡

  1. አጭር ርዕስ

ይህ መመሪያ “በፌዴራል የመንግስት መስሪያ ቤቶች በሾፌርነት ተቀጥረው የስራው ባህሪ በዘላቂነት ከመደበኛ የስራ ሰዓት ውጪ ስራ እንዲሰሩ የሚገደዱ ሾፌሮች ልዩ አበል ስለመክፈል የወጣ መመሪያ” ተብሎ ሊጠራ ይችላል፡፡

  1. ትርጓሜ

2.1. በዚህ መመሪያ “የፌዴራል የመንግስት መስሪያ ቤቶች” በሚል የተጠቀሱት በአዋጅ 515/99 አንቀጽ 2 ንዑስ አንቀጽ 3 የመንግስት መስሪያ ቤቶች በሚል በተሰጠው ትርጓሜ የተጠቀሱትን ይመለከታል፡፡

2.2. “የትርፍ ሰዓት ስራ” ማለት የመንግስት ሠራተኞችን የስራ ሰዓት ለመወሰን በወጣው አዋጅ 43/85 አንቀጽ 3 እና በፌዴራል የመንግስት ሰራተኞች አዋጅ 515/99 አንቀጽ 32 ከተመለከተው ውጨ የሚከናወን ስራ ነው፡፡

2.3. በዚህ መመሪያ “ሾፌር” ማለት በመንግስት መስሪያ ቤት ውስጥ ተሽከርካሪዎችን ለማሽከርከር በቋሚነት ተቀጥሮ ለመስሪያ ቤቱ የበላይ ኃላፊዎችና ለቤተሰቦቻቸው፣ እንዲሁም ከመደበኛው የሥራ መግቢያ ሰዓት አስቀድመው ወደ ስራ ለሚሠማሩ ሠራተኞች የሰርቪስ አገልግሎት ለመስጠተ ተመድቦ የሚያገለግል አሽከርካሪ ነው፡፡

2.4. “ልዩ አበል” ማለት በዚህ መመሪያ ተራ ቁጥር 2.3 ላይ በተገለጹ የስራ መደቦች ላይ ለሚገኙ ሠራተኞች የስራውን ባህሪ ከግምት ውስጥ በማስገባት የሚደረግ ክፍያ ነው፡፡

  1. የመመሪያው አስፈላጊነት ከሥራ ባህርያቸው የተነሳ በዘላቂነት ትርፍ ሰዓት እንዲሰሩ የሚገደዱ ሠራተኞች በየቀኑ ከ2-3 ሰዓት በበዓላት ቀናት ጭምር ተጨማሪ ሰዓት ይሰራሉ፡፡ ለዚህ አገልግሎታቸው አሁን በስራ ላይ ያለው የትርፍ ሰዓት ሥራ ክፍያ አፈጻጸም መመሪያ በወር ከ60 ሰዓት በላይ ለማሰራት የማይፈቅድ ከመሆኑም በላይ በትርፍ ሰዓት ክፍያ ስሌት መሰረት ይፈጸም ቢባልም በመንግስት ላይ ከፍተኛ ወጪ የሚያስከትል በመሆኑ እስካሁን ድረስ ተግባራዊ ማድረግ አልተቻለም፡፡ ይህም በወጪ ሲሰላ በዝቅተኛው የደመወዝ መጠን መደበኛው የሰዓት ደመወዙ በ1.5 ተባዝቶ ስለሚከፈል የወር ደመወዝ ብር 961 30 X 1.5 X 20 = ብር 960 ወጪ ይጠይቃል፡፡

በከፍተኛው የሾፌር የሥራ መደብ ደግሞ በመነሻ የወር ደመወዝ ብር 2298 30 X 1.5 X 20 = ብር 2298 የትርፍ ሰዓት ክፍያ ሰወጪ ይጠይቃል፡፡ ይህም በመንግሥት ላይ ከፍተኛ ወጪ ያስከትላል፡፡ በመሆኑም ይህንን ችግር በተወሰነ ደረጃ ለመቀነስ የተወሰኑ ተቋማት በራሳቸው መንገድ ለመፍታት የተለያየ የአፈጻጸም እርምጃ ተግባራዊ እያደረጉ ቢሆኑም ይህ ችግር በሁሉም የፌደራል ተቋማት ወጥነት ባለው ሄኔታ ባለመፈታቱ ተመሳሳይ ስራ በሚሰሩ ሾፌሮች መካከል ልዩነት ከመፍጠሩም በላይ በተለያየ ጊዜ ችግሩ አሳሳቢ መሆኑን የተለያዩ ተቋማትና ሰራተኞች እያነሱ ይገኛሉ፡፡ በመሆኑም ችግሩን በመቅረፍ ሠራተኞቹ በሙሉ ተነሳሽነት በማንኛውም ሰዓትና ጊዜ ማገልገል እንዲችሉ በቁርጥ የተወሰነ የትርፍ ሰዓት ሥራ ክፍያ አበል መወሰን ተገቢነቱ ስለታመነበት ይህ መመሪያ ተዘጋጅቷል፡፡

  1. የልዩ አበል ክፍያ አፈፃጸም

4.1. የልዩ አበል ክፍያ የሚፈጸመው በዚህ መመሪያ በተራ ቁጥር 2.3 በተዘረዘሩት የስራ መደቦች ላይ ተመድበው የሚሠሩ ሾፌሮች ከመደበኛ የስራ ሰዓት ውጪ ለስራ በሚፈለጉበት ጊዜ አገልግሎት የሚሰጡ በመሆኑ ለዚሁ አገልግሎት የሚፈጸም ክፍያ ነው፡፡

4.2. የልዩ አበል ክፍያው የሚፈጸመው በየወሩ ሲሆን አከፋፈሉም፣

  1. በመንግስት ለተሾሙ የበላይ ኃላፊዎች አገልግሎት የሚሰጡ ሾፌሮች የበላይ ኃላፊዎች በመደበኛው የሥራ ቀናት አምሽተው ከሥራ የሚወጡና ከሥራ መግቢያ ሰዓት በፊት ቀድመው ወደ ሥራ የሚገቡ ስለሆነ በዕረፍት ቀናትና በበዓላት ቀናት ጭምር በመሥራት ኃላፊነታቸውን የሚወጡ በመሆኑ ለእነዚህ የበላይ ኃላፊዎች አገልግሎች ለሚሰጡ ሾፌሮች በወር ብር 600 (ስድስት መቶ ብር)፣
  2. በስራ ባህሪያቸው ምክንያት ከመደበኛ ስራ ሰዓት በፊት ወደ ሥራ የሚገቡና አምሽተው የሚወጡ ሰራተኞችን የሚያገለግሉ የሰርቪስ ሾፌሮች፣ የዩኒቨርሲቲዎችና የፌዴራል ሆስፒታሎች አምቡላንስ አሽከርካሪዎች፣በመንግሥት ለተሾሙ የበላይ ኃላፊዎች ለቤተሰቦቻቸው አገልግሎት ለሚሰጡ ሾፌሮች ከመደበኛ የሥራ ሰዓት ውጭ ለሚያበረክቱት ሥራ በወር ብር 4ዐዐ (አራት መቶ ብር) ይከፈላቸዋል፡፡
  3. ልዩ ልዩ ድንጋጌዎች

5.1. ለፌዴራል የመንግስት ሠራተኞች የትርፍ ሰዓት ስራ ስለሚፈቀድባቸው ሁኔታዎችና ስለክፍያው መጠን እና የማካካሻ እረፍት ስለሚሰጥበት ሁኔታ የወጣው መመሪያ በዚህ መመሪያ “ሾፌር” በሚል ትርጓሜ ስር በሚካተቱ ሠራተኞች ላይ ተግባራዊ አይደረግም፡፡

5.2. ማንኛውም በዚህ መመሪያ በተዘረዘሩ የስራ መደቦች ላይ የተመደበና ልዩ አበል የሚከፈለው ሠራተኛ ለስራ በተፈለገ ጊዜ በስራ መደቡ ላይ መገኘት ግዴታ አለበት፡፡

5.3. በዚህ መመሪያ የተመለከቱ የስራ መደቦች ላይ ተመድቦ ልዩ አበል እየተከፈለው በማገልገል ላይ ያለ ሠራተኛ ከ15 ቀን በላይ ለሚያቆይ ለሌላ ስራ የተመደበ ከሆነ የልዩ አበል ክፍያው ተቋርጦ በምትኩ በጊዜያዊነት ለተመደበ ሾፌር እንዲከፈል መደረግ አለበት፡፡

5.4. ከፍ ሲል በተራ ቁጥር 4.3 የተገለጸው ቢኖርም የልዩ አበል ተጠቃሚ የሆነው ሠራተኛ ከ15 ቀን በታች ለሆነ ጊዜ በሌላ ስራ የተመደበ ከሆነ የአበል ክፍያው አይቋረጥም፡፡ ሆኖም በምትኩ አገልግሎት እንዲሰጥ የተመደበው ሠራተኛ አገልግሎት የሰጠባቸው ቀናት በትርፍ ሰዓት ስሌት ታስቦ እንዲከፈል መደረግ አለበት፡፡

5.5. ቀደም ሲል ሀምሌ 16 ቀን 2001 ዓ.ም. በቁጥር መ30/ጠ13/36/815 በተላለፈ መመሪያ ለመንግስት ተሿሚዎች ለተመደቡ ሾፌሮች ተፈቅዶ የነበረው 70 ብር አበል በዚህ ተሽሯል፡፡

5.6. በተለያዩ ተቋማት ይከፈሉ የነበሩ የተወሰኑ የሙያ አበል፣ የትርፍ ሰዓት አበል እና ሌሎች ጥቅማ ጥቅሞች በዚህ መመሪያ ለተካተቱ ሠራተኞች ይህ መመሪያ ከወጣ ጀምሮ ተፈጻሚ ማድረግ አይቻልም፡፡

  1. መመሪያው የሚጸናበት ጊዜ ይህ መመሪያ ከየካቲት 1/2007 ዓ.ም ጀምሮ የጸና ይሆናል፡፡

የፌዴራል ሲቪል ሰርቪስ ሚኒስቴር

9.14540.489673
Exit mobile version