COVID_19

በኢትዮጵያ በለይቶ ማቆያ የሚገኙ ከውጭ አገራት የመጡ መንገደኞች ለ14 ቀናት የራሳችንን ወጪ ችለን ብንቀመጥም እስካሁን ምርመራ አልተደረገልንም ሲሉ ቅሬታቸውን ተናገሩ

#ETHIO_FM 108.7

በኢትዮጵያ በለይቶ ማቆያ የሚገኙ ከውጭ አገራት የመጡ መንገደኞች ለ14 ቀናት የራሳችንን ወጪ ችለን ብንቀመጥም እስካሁን ምርመራ አልተደረገልንም ሲሉ ቅሬታቸውን ተናገሩ።

የኮሮና ቫይረስ መስፋፋቱን ተከትሎ ከውጭ ሀገር ወደ ሀገር ውስጥ የገቡ ዜጎች አስራ አምስት ቀን በለይቶ ማቆያ ክፍል ቢገቡም ምርመራ ተደርጎላቸው ወደ ቤተሰቦቻቸው መቀላቀል አለመቻላቸውን እነዚህ ወገኖች በቤተሰቦቻቸው በኩል ለኢትዮ ኤፍ ኤም ተናግረዋል።

ወደ ቤተሰቦቻቸው መቀላቀል ያልቻሉት ደግሞ እስካሁን ድረስ የኮሮና ምርመራ ስላልተደረገላቸው መሆኑን ተናግረዋል።

ቁጥራቸው አስራ ሰባት የሆኑ ዜጎች አስራ አራት ቀን ሲሞላቸው ከለይቶ ማከምያ ክፍል እንደሚወጡ ቢነገራቸውም እስካሁን ድረስ እዛው እንዳሉ ነው ቅሬታቸውን ለኢትዮ ኤፍ ኤም ያቀረቡት ቤተሰቦች የተናገሩት፡፡

ለራሳቸው እና ለህብረተሰቡ ደህንነት ሲሉ ከፍተኛ ወጪ በማውጣት የለይቶ ማከምያ ክፍል ገብተው የመቆያ ጊዜያቸው ያለፈ ቢሆንም እስካሁን ወደ ቤታቸው መግባት አልቻሉም ነው የሚሉት፡፡

በለይቶ ማቆያ ክፍል ውስጥ የሚገኙት እነዚህ ዜጎች ሆቴል ውስጥ የተቀመጡ በመሆናቸው ለከፍተኛ ወጪ እየተዳረጉም እንደሆነ ነው ቤተሰቦች ቅሬታቸውን የተናገሩት፡፡

በለይቶ ማቆያ ክፍል ውስጥ ከሚገኙ ዜጎች ውስጥ እድሜያቸው ከአስር አመት በታች የሆኑ ህጻናትም እንደሚገኙበት ነው የነገሩን፡፡

እነዚህ ህጻናት ለተለያዩ ስነ ልቦናዊ ጫናም እየተዳረጉ ይገኛሉ ሲሉ ነው እነዚህ ሰዎች ቅሬታቸውን ያቀረቡት፡፡

መንግስት ባስቀመጠው ህግ መሰረት ዛሬ የመውጫ ቀናችን ነበረ ሆኖም ዛሬ በመውጫችን ቀን የኮሮና ምርመራ ማድረግ አለባችሁ ተብለናል ሆቴሉም በበኩሉ እንድንወጣ ትዛዝ ሰጥናል ብለዋል፡፡

እስካሁን በተቀመጡበት ሆቴል የተደረገላቸው የትኩሳት ምርመራ ብቻ ነውም ብለውናል፡፡

በለይቶ ማቆያ ክፍል የሚገኙ ዜጎች የኮሮና ቫይረስ ምርመራ እንዴት እስካሁን አልተደረገላቸውም ስንል የኢትዮጵያ የህብረተሰብ ጤና ኢንስቲትዩትን ጠይቀናል፡፡

በኢንስቲትዩቱ የኮቪድ 19 ምክትል አስተባባሪ አቶ ዘውዱ አሰፋ ሳይንሱ አሁንም የተረጋገጠ ነገር የለውም ለሁሉም ሰው ደህንነት ሲባል ምርመራ የሚደረገው በመጨረሻዎቹ ቀናት ነው ብለዋል፡፡

እስከሁን ድረስ ከ2ሺህ 700 በላይ ዜጎች በለይቶ ማቆያ ክፍል ውስጥ እንደሚገኙ የተናገሩት አቶ ዘውዱ አሁንም በሆቴል በተቀመጡ ሰዎች ላይ ተጨማሪ አንድ ቀን ይኖራቸዋል ነው ያሉት፡፡

ለሁሉም በለይቶ ማቆያ ውስጥ ለሚገኙ ዜጎች ሳምፕል ተሰርቶላቸው ከቫይረሱ ነጻየሆኑት ከለይቶ ማቆያ እንዲወጡና ከቤተሰቦቻቸው ጋር እንዲቀላቀሉ ይደረጋል ቫይረሱ የተገኘባቸው ደግሞ ተጨማሪ ህክምና እንደሚሰጣቸው ተናግረው ውጤታቸው በ24 ሰአት ውስጥ ይሰራላቸዋል ሲሉ ምላሽ ሰጥተውናል።

ከሆቴሎችና ከቤተሰቦች የሚቀርቡትን ቅሬታዎች በትክክለኛው መንገድ ለማስተናገድ ጥረት እያደረጉ መሆኑንም አቶ ዘውዱ ተናግረዋል።

በሔኖክ ወ/ገብርኤል
መጋቢት 29 ቀን 2012 ዓ.ም

Categories: COVID_19

Tagged as:

Leave a Reply

This site uses Akismet to reduce spam. Learn how your comment data is processed.