በኮሮና ወረርሽኝ ስጋት ወደ ገዳማት የሚገቡ ሰዎች ቁጥር እየጨመረ ነው

በኮሮና ወረርሽኝ ስጋት ወደ ገዳማት የሚገቡ ሰዎች ቁጥር ሥጋት እንደፈጠረባቸው የገዳማት አካባቢ ነዋሪዎች ተናገሩ፡፡

በሰሜን ጎንደር ዞን እና በባሕር ዳር ከተማ አስተዳደር በሚገኙ ገዳማት አካባቢ የሚገኙ ነዋሪዎች እንዳሉት ከተለያዩ አካባቢዎች ወደ ገዳማት የሚገቡ ሰዎች ቁጥር በመጨመሩ የኮሮና ወረርሽኝ እንዳይሰራጭባቸው ሰግተዋል፡፡ በሰሜን ጎንደር ዞን ጃናሞራ እና በየዳ ወረዳዎች ነዋሪዎች እንደተናገሩት በበየዳ ወረዳ በሚገኘው የደብረ ሐዊ ጣና ቅዱስ ያሬድ አንድነት ገዳም በርካታ ምዕምን መግባት በመጀመሩ ስጋት ገብቷቸዋል፡፡ አካባቢው ቀዝቃዛ በመሆኑ ለበሽታው መስፋፋት ምቹ ሊሆን ስለሚችል ምዕመናን ወደ ገዳሙ ከመሄድ ይልቅ በየአካባቢያቸው ሆነው ቢጠነቀቁ እና ወደ ፈጣሪ ቢማጸኑ ራሳቸውንም አገርንም ሊያድኑ እንደሚችሉ አመልክተዋል፡፡

የሰሜን ጎንደር ዞን ዋና አስተዳዳሪ ወርቁ ለምለሙ ለአብመድ በስልክ እንደገለጹት የአካባቢው ነዋሪዎች ስጋት ተገቢ መሆኑን አመልክተዋል፡፡ አቶ ወርቁ እንደተናገሩት በየቀኑ በአማካይ ከ100 በላይ ሰው ወደ ቅዱስ ያሬድ ገዳም እየሄደ ነው፡፡ ወደ ገዳሙ ከአንድ ሺህ ያላነሰ ሰውም መግባቱንም ዋና አስተዳዳሪው አስታውቀዋል፡፡

ወደ ዋልድባ ገዳምም ከፍተኛ የሆነ የምዕምናን ጉዞ እንዳለ የተናሩት አቶ ወርቁ ‘‘እንዲህ ያለ ፈታኝ ጊዜ ሲያጋጥም ወደ ፈጣሪ መቅረቡ ተገቢ ነው፤ ነገር ግን መሰባሰቡና ከተለያዩ አካባቢዎች ወደ አንድ ቦታ መሄዱ የበለጠ ለችግር ሊያጋልጥ ስለሚችል፤ ችግርም ቢከሰት በአካባቢዎቹ ፈጣን ድጋፍና ሕክምና ለማድረስ መሠረተ ልማት ስለሌለ ምዕመኑ በየቤቱ እንዲቀመጥ አሳስበዋል፡፡ ከዛሬ ጀምሮ አስገዳጅ ላልሆኑ ጉዞዎች የተሽከርካሪ ስምሪት ከወረዳ ወደ ወረዳም ሆነ ወደ ዞኑ እንዳይኖር በሁሉም የዞኑ ወረዳዎች ክልከላ መተላለፉንም አቶ ወርቁ አስታውቀዋል፡፡

ሳምንታዊ ገበያዎች ሰው እንዳይበዛባቸው፣ በገበያ ቀን የሚደረጉ የመርዶ ለቅሶ ሥርዓቶች እንዲቆሙ በየወረዳው ኅብረተሰቡ እየወሰነ መሆኑንም አመልከተዋል፤ ለዚህም የበየዳ ወረዳን ቅድሚያ ወስዶ በመተግበሩ ምሳሌ አድርገዋል፡፡

ከባሕር ዳር ከተማ አስተዳደር አስተያዬት የሰጡን ነዋሪዎች ደግሞ በርካታ ቁጥር ያላቸው ሰዎች በብዛት ወደ ደቅ ደሴት እየገቡ እንደሆነ ተናግረዋል፤ አስተያዬት ሰጭዎቹ እንዳሉት ትናንት እና ዛሬ ብቻ ቁጥራቸው በውል ያልታወቀ በርካታ ሰዎች ወደ ገዳሙ ገብተዋል፡፡

ከደቅ ደሴት ያነጋገርናቸው አስተያዬት ሰጭ ደግሞ ‘‘የመንግሥትን ዓዋጅ እየጣሱ እየመጡብን ነው፤ ለ14 ቀን ለብቻ እየቆያችሁ ግቡ ብንልም አልሰሙንም፡፡ በትናንሽ ጀልባዎች እስከ 100 ሰው እየሆኑ እየመጡ እየገቡ ነው፤ እኛ ወደ ባሕር ዳር መሄድ አቁመናል፤ ግን ከእሰይ ደብር፣ ከባሕር ዳር፣ ከአዲስ አበባና ከሌሎችም አካባቢዎች እየመጡ እየገቡብን ነው፡፡ የኛ ወደ 15 ጀልባዎችን ሥራ እንዲያቆሙ ብናደርግም በሌላ ጀልባ እየመጡ አስቸግረውናል’’ ብለዋል፡፡

አብመድ ጉዳዩን በተመለከተ የባሕርዳር ከተማ አሥተዳደርን ለማነጋገር ጥረት እያደረገ ነው፡፡ ከተማ አስተዳደሩ ዕውቅና ስለመኖሩና ጉዞውን ለማስቆም ምን እሠራ እንደሆነ መረጃ እንዳገኘን እናሳውቃለን፡፡

ምንጭ: AMHARA MASS MEDIA AGENCY

ዘጋቢ፡- አብርሃም በዕውቀት
ፎቶ፡- ከድረ ገጽ

One comment

Leave a Reply

This site uses Akismet to reduce spam. Learn how your comment data is processed.