COVID_19

ተከርቸም ባወጀችው ባህርዳር ነዋሪዎች 15 ቀን ውሀ አጥተዋል

ችግሩ ለኮሮና ወረርሽኝ ስጋት እንደሆነባቸውም ነው ነዋሪዎቹ የገለጹት፡፡

ባሕር ዳር፡ መጋቢት 28/2012 ዓ.ም (አብመድ)

በባሕር ዳር ከተማ አስተዳድር ዳግማዊ ምኒሊክ ክፍለ ከተማ አካባቢዎች አብመድ ያነጋገራቸው ነዋሪዎች እንደገለጹት በከተማ አስተዳድሩ ያጋጠመው የውኃ ችግር እንዲፈታ ያቀረቡት ተደጋጋሚ ጥያቄ ምላሽ ማግኘት አልተቻለም፡፡ በተለይም ደግሞ በዚህ ወቅት የተከሰተውን ሙቀት እና የኮሮና ወረርሽኝ ለመከላከል የግልም ሆነ የአካባቢ ንጽሕናን ለመጠበቅ ፈተና እንደሆነባቸው ነዋሪዎቹ ገልጸዋል፡፡

ችግሩ እንዲፈታ በተደጋጋሚ ለክፍለ ከተሞች፣ ለከተማ አስተዳድሩ እና እስከ ክልል ጥያቄ በተወካዮቻቸው አማካይነት ማቅረባቸውንም ነው ነዋሪዎች የገለጹት፡፡ መንግሥት የማይሠራው ከሆነም ማኅበረሰቡ በራሱ ወጭ ለማሥራት ለከተማ አስተዳድሩ ጥያቄ አቅርበው እንደነበርም ገልጸዋል፡፡ ይሁን እንጅ በየ10 ቀኑ እንደሚደርሳቸው ቢነገራቸውም ከ15 ቀናት በላይ ውኃ ማግኘት አለመቻላቸውን ነዋሪዎች ነግረውናል፡፡

ችግሩ ባለመፈታቱ ለምግብ ማብሰያነትም ሆነ ለመጠት የታሸገ ውኃ ገዝተው ለመጠቀም መገደዳቸውንና ይህም ለከፍተኛ ወጭ እንደዳረጋቸውም ገልጸዋል፡፡ በተለይም ደግሞ ከፍተኛ ቦታ ላይ በሚገኙ አካባቢዎች ችግሩ የከፋ እንደሆነ ገልጸዋል፡፡ ነዋሪዎች እንደገለጹት ከኮሮና ወረርሽኝ ጋር ተያይዞ ውኃ ካለበት አካባቢ ሄደው ለማምጣትም ተቸግረዋል፡፡ በተለይም ደግሞ በርካታ ሰዎች በሚኖሩበት በጋራ መኖሪያ ቤቶች አካባቢ በውኃ ችግር ንጽሕናቸውን ለመጠበቅ ተቸግረዋል፡፡

ባሕር ዳር ከተማ አስተዳድር ውኃ እና ፍሳሽ አገልግሎት ጽሕፈት ቤት ዋና ሥራ አስኪያጅ ይርጋ ዓለሙ እንደገለጹት በከተማው እየጨመረ የመጣው የሕዝብ ቁጥር እና የውኃ አቅርቦቱ አለመመጣጠን ለችግሩ ምክንያት እንደሆነ ተናግረዋል፡፡ በተለይም በከተማው ዳር እና ዳር አካባቢዎች በበጀት ችግር በቂ የውኃ መስመር መዘርጋት ባለመቻሉ ችግሩ ማጋጠሙን ገልጸዋል፡፡ ያለውን ውኃም በፍትሐዊነት ለከተማ ማኅበረሰብ በፈረቃ ለማዳረስ የፓምፕ ብልሽት እና የመብራት መቆራረጥ ፈተና እንደሆነባቸውም አቶ ይርጋ ገልጸዋል፡፡

ይሁን እንጅ በቅርቡ የከተማ አስተዳድሩ በፈቀደው በጀት ወደ ሽራ ተገብቶ 95 በመቶ የመስመር ዝርጋታ መጠናቀቁን ሽራ አስኪያጁ ገልጸዋል፡፡ ቀሪ ሥራውን በአጭር ጊዜ በማጠናቀቅ ውኃ በየቤቱ እንደሚለቀቅም አቶ ይርጋ አመላክተዋል፡፡

ችግሩ በተከሰተባቸው ክፍለ ከተሞች በጊዜያዊነት አራት ቦታዎች ላይ የውኃ ቦኖዎች እንዲያገኙ መደረጉንም ሥራ አስኪያጁ ገልጸዋል፡፡ ችግሩ በሚብስባቸው እንደ መኮድ፣ ዶና በር፣ ቀበሌ ሰባት እና ዓባይ ማዶ አካባቢዎች ደግሞ በሁለት የውኃ ቦቲዎች ውኃ እያቀረቡ እንደሆነ ሥራ አስኪያጁ ገልጸዋል፡፡

በባሕር ዳር የተጀመሩ የንጹሕ መጠጥ ውኃ ፕሮጀክቶች በወቅቱ አለመጠናቀቅ እያደገ ከመጣው ፍላጎት ጋር ተዳምሮ የአቅርቦች ችግር መፍጠሩን አብመድ በተደጋጋሚ መዘገቡ የሚታወስ ነው፡፡

ዘጋቢ፡- ዳግማዊ ተሰራ

Leave a Reply

This site uses Akismet to reduce spam. Learn how your comment data is processed.