የዱከም ከተማ አከራዮች የቤት ኪራይ ቅናሽ አደረጉ

በዱከም ከተማ 519 የቤት አከራዮች እስከ 2 ወር የሚደርስ የቤት ኪራይ መቀነሳቸውን አስታወቁ፡፡

የዱከም ከተማ አስተዳደር የኮሮና ቫይረስ ስርጭትን ለመቆጣጠር እንዲቻል መንግስት ዜጎች በቤታቸዉ እንዲቆዩ መወሰኑን ተከትሎ ነዋሪዎች የቤት ኪራይ እንዳያሳስባቸዉ እና እንዳይቸገሩ በማሰብ የቤት አከራዮች ለተከራዮቻቸው የአንድ ወር የቤት ኪራይ እንዲቀንሱ ባቀረበዉ ጥሪ መሰረት 519 የቤት አከራዮች ከአንድ ወር እስከ 2 ወር የሚደርስ የቤት ኪራይ መቀነሳቸውን ገልጸዋል፡፡

በከተማዋ ዋልታ ያነጋገራቸው የቤት አከራዮችና ተከራዮች ይህ ውሳኔ የቫይረሱን ሥርጭት ለመግታት የሚደረገው ጥረት ለማገዝ እንደሚረዳ ተናግረዋል፡፡

ይህ ተግባር ሌሎችንም የሚያስተምር በመሆኑ እንዲከተሉትና በሰብዓዊነት እንዲያደርጉት የጠየቁት አከራዮችና ተከራዮች የንግድ ተቋማትን የሚያከራዩ ባለቤቶች እንዲህ ዓይነት ተግባር እንዲፈፅሙ በአስተያየታቸው ጠይቀዋል፡፡

የዱከም ከተማ አስተዳደር ከንቲባ አቶ ተሾመ ግርማ በከተማዋ የሚገኙ የቤት አከራዮች ያደረጉት ተግባር የሚያስመሰግን መሆኑን ገልጸው የቫይረሱን ሥርጭትን ለመከላከልና በሽታው ቢስፋፋ የከፋ ችግር እንዳያደርስ ምግብና ምግብ ነክ ያልሆኑ ቁሳቁሶችን በማሰባሰብ ላይ እንደሚገኙ ተናግረዋል፡፡

በከተማዋ የሚገኙ አብዛኞቹ ሰራተኞች በመሆናቸው በቤታቸው በሚቆዩበት ጊዜ በቤት ኪራይ ምክንያት ሃሳብ ውስጥ እንዳይገቡና የቫይረሱን ሥርጭት በመከላከል ረገድ የበኩላቸውን እንዲወጡ ያስችላቸዋል ብለዋል፡፡

ምንጭ: ዋልታ

(በስመኝ ፈለቀ)

Leave a Reply

This site uses Akismet to reduce spam. Learn how your comment data is processed.