የጀርመን የኮረና ክትባት ሙከራ

ጀርመን በቅርቡ የኮሮና ክትባት በሰዎች ላይ መሞከር እንደምትጀምር የአገሪቱ የክትባት እና ባዮሜድስን ኢንስቲትዩት አስታወቀ። ከሕመሙ የሚያገግሙ ሰዎች ቁጥር አዲስ ከሚያዙት በመብለጡ ወረርሽኙ በጀርመን በቁጥጥር ሥር ሊውል ከሚችልበት ደረጃ መድረሱን የአገሪቱ ጤና ምኒስትር ተናግረዋል።
የጀርመን የክትባት እና ባዮ ሜድስን ኢንስቲትዩት ኃላፊ ፕሮፌሰር ክላውስ ሲቹቴክ እንዳሉት የኮሮና ተሕዋሲን ለመከላከል የሚያስችል ክትባት ሙከራ በቅርቡ ይጀመራል። እንዲህ አይነት የክትባት ሙከራ በሌሎች አገሮች ቀድሞ ቢጀመርም በጀርመን ለመጀመሪያ ጊዜ እንደሚደረግ ኃላፊው ተናግረዋል። ሥራ ላይ ለማዋል የሚያስፈልገውን ፈቃድ ማግኘት ውስብስብስ እንደማይሆን የተናገሩት ፕሮፌሰር ክላውስ ሲቹቴክ ሰውነት ሊታገሰው የሚችል ስኬታማ ክትባት ማበጀቱ ረዥም ጊዜ እንደሚወስድ ገልጸዋል። ኹነኛ የኮሮና ክትባት ለማበጀት የሚደረገው ምርምር ከ12 እስከ18 ወራት ይወስዳል ተብሎ ይጠበቃል።
ጀርመን፦ ከአሜሪካ፣ ስፔን፣ ጣሊያን፣ እና ፈረንሳይ ቀጥሎ ወረርሽኙ በከፍተኛ መጠን የተስፋፋባት አገር ነች። በጀርመን 134,000 ገደማ ሰዎች በተሕዋሲው ቢያዙም በኮሮና ሳቢያ ሕይወታቸውን ያጡት ግን 3,868 ብቻ ናቸው። አገሪቱ አስቀድማ በስፋት የኮሮና ምርመራ ማድረጓ እና በወረርሽኙ ሳቢያ ወደ ሕክምና የሚያመሩ ሕሙማንን የጤና ተቋማቱ በብቃት ማስተናገድ መቻላቸው የሟቾችን ቁጥር ለመቀነስ አስችሏታል። የጀርመን ጤና ምኒስትር የንስ ሽፓን እንዳሉት አገራቸው ወረርሽኙን በቁጥጥር ሥር ማዋል ትችላለች።
የጀርመን ጤና ምኒስትር የንስ ሽፓን “ወረርሽኙ ዛሬ ላይ ሆነን ስንመለከተው በቁጥጥር ሥር ሊውል የሚችል ነው። ከሚያዝያ 4 ጀምሮ በኮሮና ከሚያዙ አዳዲስ ሰዎች ይልቅ ከሕመሙ የሚያገግሙት ቁጥር ይበልጣል። በሮበርት ኮኽ ኢንስቲትዩት መረጃ መሠረት በኮሮና ከተያዙ 130,000 ሰዎች መካከል ከ80,000 በላይ የሚሆኑት አገግመዋል” ብለዋል። በጀርመን ወረርሽኙን ለመቆጣጠር ገቢራዊ የተደረጉ ገደቦች በሒደት እንዲላሉ የግዛት ጠቅላይ ምኒስትሮች እና መራሒተ-መንግሥት አንጌላ ሜርክል ተስማምተዋል። የጤና ምኒስትሩ ይኸን ውሳኔ ተገቢ ብለውታል። 👉🏾 @dwamharicbot

Leave a Reply

This site uses Akismet to reduce spam. Learn how your comment data is processed.