COVID_19

ጀርመን ኮሮናን በመዋጋት ውጤት እያስመዘገበች ነው

በጀርመን ስለ ኮሮና ተሐዋሲ ሥርጭት ዝርዝር መረጃዎችን የሚያቀርበው ሮበርት ኮኅ ኢንስቲትዩት (RKI) የተሰኘው ተቋም የአፍና የአፍንጫ መከለያ ጭምብል ማድረግን በተመለከተ ቀድሞ የነበረውን አመለካከት ቀየረ።

ተቋሙ ቀደም ሲል ጭምብሉ መደረግ ያለበት በኮሮና ተሐዋሲ በተጠቊ ሰዎች እና በሕክምና ባለሞያዎች ነው፤ ኅብረተሰቡ ሌሎች መከላከያዎችን ማድረግ ነው የሚገባው ሲል ነበር። አኹን ተቋሙ በያዘው አቋም ኅብረተሰቡ የአፍና የአፍንጫ ጭምብሎችን ቢያደርግ በኮሮና ተሐዋሲ የመያዝ ዕድሉን ይቀንሳል ብሏል። ያም ኾኖ ግን ማኅበረሰቡ እጅን መታጠብ እና አካላዊ መራራቅ የተባሉትን ምክሮች ሳይዘናጋ መተግበር እንዳለበት አስገንዝቧል።

የተቋሙን ምክረ-ሐሳብ የሰሙ በርካታ ሰዎች የአፍና የአፍንጫ መከለያ ጭምብል እቤት ውስጥ እንዴት ቀዶ መስፋት እንደሚቻል የሚያሳዩ ቪዲዮዎችን እና ጽሑፎችን በኢንተርኔት ለቀዋል። እንደ ደቡብ ኮሪያ ባሉ የእስያ ሃገራት ውስጥ የሚገኙ ባለሞያዎች ከሃገራቸው ውጪ ያሉ ሰዎችም እንደነሱ የአፍ እና አፍንጫ መከለያ ጭምብሎችን እንዲያደርጉ በተደጋጋሚ ሲያሳስቡ ነበር።

በጀርመን ሀገር የኮሮና ተሐዋሲ ሥርጭት ኅብረተሰቡ መመሪያዎችን በመከተሉ አንድ በተሐዋሲው የተጠቃ ሰው በአማካይ ተሐዋሲውን የሚያስተላልፈው ለአንድ ሰው ብቻ ነው ተብሏል። በሌሎች ሃገራት ሲታይ ስርጭቱ እጅግ ከፍተኛ ነው። ሮበርት ኮኅ ተቋም እንዳለው ከኾነ ጀርመን የተሐዋሲውን ሥርጭት ለመግታት የወሰደችው ርምጃ አመርቂ ውጤት አስመዝግቧል። በእርግጥ የኮሮና ተሐዋሲ ወረርሽኝ ጀርመን ውስጥ ገና መጀመሪያ ደረጃው ላይ ስላለ መዘናጋት አያሻም ብሏል።

ጀርመን ውስጥ በተሐዋሲው ታመው የሞቱ ሰዎች በአማካይ ሲሰላ የ80 ዓመት ሰዎች ናቸው ተብሏል።

Categories: COVID_19

Leave a Reply

This site uses Akismet to reduce spam. Learn how your comment data is processed.