በጋምቤላ ክልል 51 ሰዎች ከደቡብ ሱዳን ወደ ክልሉ ድንበር ጥሰው መግባታቸው ተገለጸ

Source: Ethio-Fm

በጋምቤላ ክልል 51 ሰዎች ከደቡብ ሱዳን ወደ ክልሉ ድንበር ጥሰው መግባታቸው ተገለጸ፡፡

ምንም እንኳን የድንበር ላይ ጥበቃው በተጠናከረ መንገድ ቢቀጥልም በህገ ወጥ መንገድ ከደቡብ ሱዳን ወደ ጋምቤላ ክልል የሚሻገሩ ሰዎች ስለመኖራቸው ተነግሯል፡፡

የኮሮና ቫይረስ ወረርሽኝ በኢትዮጵያ ብሎም በደቡብ ሱዳን ከተከሰተ በኋላ ክልሉን በሚያዋስኑ አምስት ድንበሮች ከፍተኛ ጥንቃቄ እየተደረገ ነው።

የክልሉ ሰላምና ፀጥታ ዘርፍ ም/ሃላፊ አቶ ኦቶው ኦኮት ለኢትዮ ኤፍ ኤም እንዳሉት 51 ሰዎች ከደቡብ ሱዳን ድንበር ጥሰው ወደ ጋምቤላ ክልል ገብተዋል።

እነዚህ ሰዎች ድንበር ጥሰው መግባታቸው የታወቀው በተደረገው አሰሳ መሆኑን ሃላፊው ተናግረዋል፡፡

የኮሮና ወረርሽኝ ከመከሰቱ በፊት የክልሉን ድንበር ጥሰው የገቡ ከ 2 ሺ 500 በላይ ስደተኞች መኖራቸውን የነገሩን ሃላፊው ስደተኞቹ ወደ መጠለያ ጣቢያ እንዲገቡ ተደርገዋል ብለዋል።

በሽታው ከተከሰተ በኋላ ወደ ክልሉ ድንበር ጥሰው የገቡ 51 ሰዎችም ወደ ለይቶ ማቆያ እንዲገቡ መደረጉንም ሰምተናል፡፡

ወረርሽኙ ከፍተኛ ጉዳት እንዳያስከትል የተለያዩ የፀጥታ አካላት በአምስቱም የድንበር ኬላዎች ከፍተኛ ጥበቃን እያካሄዱ ቢሆንም ክልሉን በይበልጥ ለደቡብ ሱዳን ተጋላጭ የሚያደርጉ መግቢያዎች በመኖራቸው ጉዳዩን አሳቢ እንደሚያደርገው ተጠቁሟል፡፡

በተጨማሪም የኮሮና ናሙና መሳሪያ እስካሁን ድረስ በክልሉ ያለመጀመሩ ከፍተኛ ተፅእኖ ማሳደሩንም አቶ ኦቶው ነግረውናል፡፡

በየውልሰው ገዘሙ
ግንቦት 3 ቀን 2012 ዓ.ም

Leave a Reply

This site uses Akismet to reduce spam. Learn how your comment data is processed.